「娛樂新聞台」新女神-梁家琪(Khaki)工作受賞識，日前更獲安排重任，為電影《無間一戰》慈善首映上初挑大樑，夥拍安德尊擔任大會司儀，這亦她首次擔任大型司儀工作，又遇著前輩安德尊更不容有失，有如考牌一樣心情特別緊張，順利過關亦鬆一口氣。
「好彩有大王(安德尊)照顧我，佢好細心教我點樣讀司儀稿，喺邊個位要重音，幾時又要輕音，有大王喺身邊真係放心好多 !」家琪好重視今次司儀工作，事前做足準備將司儀稿讀熟，只不過始終是第一次，自問有不少改善空間，希望下一次做得更好。而安德尊對於家琪的表現就話第一次擔任司儀，家琪已做得很好，笑言反而要跟家琪學新嘢。
到北京進修演藝課程十分充實
早前家琪趁有時間，到北京進修一個月演藝課程，期間看了很多電影，從中學習演技。由於梁家琪母親與黃曉明相熟，她在北京更特別前往欣賞由黃曉明監製的新戲《最後的真相》首映，她說:「我一向都好鍾意黃曉明演戲，好開心夾到時間去睇《最後的真相》首映，曉明哥好靚仔，加上演技又好，呢部係佢第一次擔任監製，真係好勁好敬佩佢，我仲問佢攞貼士，點樣可以台前幕後都兼顧得咁好! 」
台下欣賞新港姐出爐 回想去年參選另一番滋味
本年度新一屆港姐剛於上周日出爐， 梁家琪在現場欣賞，看見台上佳麗就令佢回憶起去年自己參選港姐的情況。
「真係冇諗過時間過得咁快，坐喺台下嘅感覺同去年企喺台上參選係兩回事，其實每位參選佳麗經過兩三個月訓練就要上台，係好勇敢嘅事，令人佩服，比賽當晚播出嘅兩首港姐音樂，我一聽到音樂就眼濕濕，加上坐喺我身邊都係去屆候選佳麗，大家嘅回憶就湧番晒出來 ! 經過一年，我覺得自己無論思想或者心態方面都成熟咗。」
家琪話一年時間很快便過，自己仍然是新人，雖然渴望嘗試更多不同崗位，但亦知道必須努力增值，裝備好自己。
不斷增值進修 希望演藝事業有進步
「我報咗香港演藝學院嘅一個進修課程，啱啱又喺北京讀咗一個月嘅表演課堂，雖然短短一個月，但密集式上課，星期一至五都要上堂，而落咗堂之後又要排練話劇，真係學到好多，我一直好想去北京電影學院進修，希望以後繼續有呢個機會。」
コメント