剛剛再下一城於健美小姐大賽再奪金獎嘅黃榕(Gloria)喺旺角健身中心擔任教練,為將於下星期二(29日)舉行嘅《2022大閘蟹小姐競選》總決賽同佳麗進行健美訓練,更為佢哋精心編排韓國網絡大熱「蟹舞」。現場四位總決賽佳麗包括: 應屆《亞洲小姐2021 季軍》、《Miss Diva 2015 Winner》、《亞洲美人魚小姐》、《國際潛水小姐》、「嫰版葉翠翠」-梁欣娟(Yuki) , 日航空姐《世界旅遊小姐2017》-單穎蘅(Eiko) , 現正熱播TVB 《CP訓練營》女角、《亞洲小姐2019 季軍. 最上鏡小姐 》- 范莎莎(ZaZa) , 第五十屆《工展小姐》亞軍兼最具魅力獎與最佳口才獎 - 張芷瑜 (Kelly)都同黃榕教練一樣著哂橙色運動裝,似足活生生大閘蟹。黃榕話早前參加咗8次健美比賽,好開心今次再攞到金奬,好似為將於12月生日嘅佢提前慶祝:「得奬之後多咗好多對健美有興趣嘅粉絲message我,尤其係真係想認真令自己體型變好嘅女仔,唔係好似以前咁淨係得宅男Fans。」佢又話多咗好多客戶或者公司團隊搵佢上Group Training: 「好似今次咁,好開心好朋友Karl搵我幫大閘蟹小姐做教練。呢隻蟹舞歌原自泰國,係韓國人氣女團BlackPink嘅Lisa有跳之後爆紅。我就好用心咁改編咗適合四位佳麗體型同跳舞程度嘅舞步,有蟹步同皇后嘅招牌動作,好貼題。」被問到四位佳麗跳成點時,佢點出指范莎莎(ZaZa)最有潛質,梁欣娟(Yuki)可能都有選亞姐時排舞經驗都好識擺Pose。
而范莎莎(ZaZa)表示自己一向好動,平時好鍾意做運動同跳舞,今次隻舞好得意,突顯到原來自己都有咁Cute嘅一面:「自己身型細細粒,之前有上過跳舞堂都有比人話過似舞后蔡依林,都想好似佢咁做舞后又有咁好發展。」佢仲話本身自己超級鍾意食大閘蟹,今次參加大閘蟹小姐志在成日有得狂食大閘蟹。仲話知道總決賽冠軍有五萬蚊現金另加禮物,但佢話寧願要總決賽裏面果個愈三百隻大閘蟹山獨食好過,名副其實係「大閘蟹控」。對於佢有份主演現正熱播TVB 《CP訓練營》配對真人騷節目,佢表示大家都相處得好融洽:「自己有一段時間無拍拖,抱住識朋友嘅心態,但如果真係自己鍾意果Type又相處到,都會全程放真感情投入。」節目播出CP情侶們一齊去Staycation,一男一女要同房過夜共處。ZaZa話一開始有啲尷尬,但之後又覺得係一個好好了解男仔性格同習慣嘅時刻。仲話對自己素顏樣有百分百信心:「我絕對可以素顏出街,甚至上鏡。果日同房個CP男仔都仲認得我,無以為第二個女仔入錯房,哈哈。」剛剛那一集播出四Pair CP男女中得佢一個無比男仔揀中約會,有網民笑佢「賣剩蔗」,亦同時有一批護主心切嘅網民陸續留言力撐ZaZa唔係咁差,唔做作, GirlFriendable。樂觀嘅ZaZa話好戲在後頭,可能係先苦後甜呢。對於最後有無CP配對成功大賣關子,仲叫大家睇呢兩晚會播出有呎道大嘅同CP真咀錫錫環節。