國際獅子總會中國港澳三0三區一直弘揚「We Serve我們服務」的獅子精神，早前召集了近100名獅友，成功於2024年10月10日至10月14日用5天時間，在中國銀川騰格里沙漠完成全程約66公里的《獅籌之路 – 沙漠慈善行》，剛渡過57歲生日的黃智賢(Ben) ，亦是今次慈善沙漠行的活動大使之一，他亦有親身參予今次有意義的沙漠行，聯同國際獅子總會中國港澳三0三區總監 沈顏先生及活動大會聯合主席第四分區主席 黃啟智先生與第六分區主席 施禮賢先生、「獅籌之路」活動顧問暨極地同行創辦人及主席 盧俊賢先生，以及另外三位活動大使，包括四大極地馬拉松大滿貫冠軍 黃浩聰先生、殘奧視障跑手 李振輝先生、香港復康力量主席 葉湛溪先生一起身體力行參予，亦是他人生第一次到沙漠。
起初都擔心年紀大體力不繼
日前《獅籌之路–沙漠慈善行》舉行發佈會，不過黃智賢返內地開工未有出席，但阿Ben仍很希望分享今次感受，他說:「當初獅子會邀請我，心情真係十五、十六，年輕時候好嚮往去沙漠，因為沙漠俾我很神祕感覺; 但而家年紀大咗，所以事前都擔心能力可唔可以應付。」為了有足夠準備，Ben事先亦搵過資料，揀著白色長袖衫褲防曬。
他續說:「知道十月天氣唔差，唔太熱，但畢竟沙漠係冇遮擋陽光嘅地方，果然到下午就陽光充沛，而因為之後要開工又不可以曬燶就做好防曬，但最後都曬黑咗唔少。」
在沙漠步行感受好震撼畫面
他透露因為要開工，沒有完成五天沙漠行程，只參與行了一站即一天行程，但對他來說已經是很好的體驗。Ben說:「真係幾大考驗和挑戰 ，原來我腳骨力都唔差。我拍咗一條片做紀錄，其中要上一條大斜坡，好斜，沙又好鬆，踩落去好似吸住雙腳，消耗唔少氣力，走完這段路腳仔軟，但又好快又下坡，而下坡果段路好開心，索性坐在地上滑落去，今次在沙漠上坡下坡路程，睇到浩瀚沙漠，好震撼嘅畫面，真係既興奮亦好滿足，就好似回到年輕時候那種熱血，那種團隊精神，似一群學生去大旅行，我可以用『不枉此行』四個字去形容。」
呼籲大眾捐款至中國港澳三0三區服務基金
Ben更稱今次行程很有義意義，他呼籲大眾可以繼續捐款，希望能籌到預期200萬善款目標，因為全數100%捐款至中國港澳三0三區服務基金，轄下之八大服務，令市民受惠。他今次與獅子會一起參予行程大家更熟落，感受到一班人集合的力量和熱心，完全不記掛工作，只為服務大眾，籌到善款就去幫到人，所以很感謝他們的邀請。
善款將投放於八大服務範疇
籌款將投入中國港澳三0三區服務基金的八大服務範疇當中，包括兒童癌症、糖尿病、視力、青少年、災難援助、環境、人道主義及饑餓。獅子會期望善款能夠為受兒童癌症影響的兒童及家庭提供援助，同時希望降低糖尿病的發病率，獅子會亦致力預防可避免的失明，並為青少年提供所需支援，讓他們成為下一代的服務領導者，在「兒童癌症」、「糖尿病」、「視力」及「青少年」服務上盡心竭力。同時，在全球服務層面上，獅子會注重保護環境，協助受自然災害破壞社區的需求，及有需要者提供人道支援，更努力改善全球糧食安全，在「災難援助」、「環境」、「人道主義」及「饑餓」服務上不遺餘力。
Commentaires