top of page

關注肺炎球菌 守護媽媽及家人社康協會母親節呈獻「家燕媽媽肺事話你知」薛家燕罕有到酒樓獻唱 為近百歲長者獻花自言人生使命是分享快樂 透露將在新加坡慶祝母親節



由專業醫療人員所創的社康協會,秉持「社、醫、護」三方協作的理念,為居民提供全面醫療護理服務,積極提升及增強市民預防疾病的意識與保健能力。由於肺炎球菌是香港致命疾病排名第二,協會趁母親節將至,舉辦「關注肺炎球菌 守護媽媽及家人」活動 —— 「家燕媽媽肺事話你知」,以喚起大眾對肺炎球菌的關注,並推廣最新的預防疫苗。

 

薛家燕今日(8日)到美孚出席「家燕媽媽肺事話你知」活動,大受現場的長者歡迎。期間演出短劇,透過故事以輕鬆手法分享健康資訊,她說:「你哋細細個就睇我做戲,我細細個就做戲㗎啦,多謝大家嘅支持,我哋最緊要身體健健,咁就皆大歡喜啦!」家燕媽媽隨即獻唱經典作品《皆大歡喜》兼大跳十字步:「呢個係好健康嘅運動嚟㗎,大家都要跳多啲。」為現場帶來愉快氣氛。協會亦邀請長者們參與活動,當中更有近百歲長者,家燕媽媽向他們獻花,提早分享母親節的溫馨暖意。她直言自己早已是長者行列,自己亦希望健康點繼續有活力,為大家帶來歡樂。

 

家燕媽媽於活動後受訪,她坦言平日很少到茶樓獻唱:「今日係好特別嘅,因為我知道有啲老人家已經九十幾歲,真係睇住我長大,見到佢哋特別有親切感,所以今日真係好值得嚟,同大家分享啲健康資訊。」她指許多疾病亦會影響肺部,很需要大家的關注:「長者最緊要身體健康,我哋健康,屋企人都安心快樂。我真係好忙㗎,仔女又大晒,工作又接唔停,有時個女都要幫我推咗啲工作,不過我自己有個使命,覺得要同大家分享快樂,所以最緊身體健康。」

 

家燕姐笑謂現時不敢隨便祝福長者長命百歲:「頭先有個已經99歲啦,聽講香港人壽命好長,因為我哋活躍又勤奮,如果唔係個人鬆弛咗,個腦都冇咁靈活,所以我都唔會退休㗎。唱歌要練丹田氣,跳舞又係好好嘅郁動,兩樣對身體都好,尤其跳十字步好柔和嘅,又唔會太劇烈。」她表示現在因為工作關係,經常到不同地方拍攝及演出,忙碌得來很享受:「好多美食,又可以睇到唔同地方。我自己都有個心願,除咗家燕媽媽藝術中心同自己品牌嘅曲奇、湯水,我希望遲啲自己設計啲長者服裝。好多人話我成日着到彩色咁,人真係要着得彩色啲先開心,尤其長者,我希望我嘅衫可以令佢哋着得青春可人、有活力。」

 

至於星期日的母親節,家燕姐將與四位視帝到新加坡:「我會同羅嘉良、黎耀祥、馬德鐘、陳展鵬去新加坡表演,佢哋個個都帶埋老婆去,咁我就帶埋仔女、新抱同個孫去,順便周圍玩吓。我個孫好有表演慾,所以我都同佢練咗首歌,到時喺台上唱畀大家聽。」




0 次查看0 則留言

Comments


bottom of page