top of page

《MusicSus延音Busking計劃》Master Class 004王菀之分享音樂創作經驗 從未偏離唱作初心 死期可以迫出小宇宙



王菀之(Ivana)早前於旺角麥花臣滙為香港遊樂場協會首個年度音樂企劃《MusicSus延音Bucking計劃》Master Class 004 擔任星級講師,與學員們分享音樂創作的歷程,該計劃早前已邀得林一峰、鄺敏慧及徐偉賢擔任講師,而周鍚漢亦將於2月24日壓軸講授最後一場 Master Class。企劃的終期匯演將於3月14日假麥花臣舉行,為學員們提供演出平台,讓他們透過音樂展現年青人的才能。

 

會上,Ivana表示自己成為唱作歌手接近20年:「我同大家一樣都係由學樂器到鍾意寫吓歌開始,由唔知道點樣將自己手寫出嚟嘅嘢變成錄製嘅歌,知道點錄製又唔識得推出,識得推出又唔識得宣傳咁樣,一路慢慢去學習。」多位延音計劃學員輪流向Ivana提問,被問她如何保持創作初心?Ivana笑謂:「我要諗諗先,我應該係冇偏離初心,所以先搞成咁,都依然係為自己創作行先,所以有時要預咗有啲曲風係冇咁多人有共鳴。」

 

她直言從落筆寫歌的一刻,已經知道這首歌會得到幾多聽眾,對於有學員提到在社交平台出歌,如何吸引更多點擊?Ivana說:「你嘅作品從來都唔關view數字,你要有信心同鍾意先可以擺上網,view數實在有太多原因影響,連擺上網嗰日有冇其他事情發生都關事,你擺上網係為咗畀人哋多一個選擇。」她又指創作的標準應該由自己去定義:「例如做音樂會,就做好人哋願意買飛嘅標準,hopefully可以做到,但至少做好自己嘅準備就好足夠。正如寫歌咁,演唱會就嚟啦,寫首賣飛嘅歌得唔得?得,咁咪《末日》囉。但係如果有日係我有嘢想講,寫首《Shattered》咪冇人聽囉,但係無論點,我都對自己作品有信心。」

 

談到Ivana為其他歌手寫歌的取捨,她透露自己會先聽對方至少十首歌,同時亦會為對方的聲線而度身訂造:「究竟你落筆去寫係為咩,為自己定為市場,如果人哋有要求,呢個係package嚟,就變咗你應該要付嘅責任,唔可以人哋要抒情歌,你夾硬要寫rap畀人,咁都係不負責任。」另外被問到她於歌唱路途的心得,Ivana自嘲:「我嗰條路途好崎嶇,呢20年,我有一個心得,我一係唔唱,一唱我就100%去享受我嘅表演,觀眾鍾唔鍾意我唔知,但係音樂一響起,我就會進入嗰個音樂世界,我會好珍惜嗰個世界。記得初初有其他歌手會話,點解我唔同觀眾講嘢?我話,我唱歌點解要同觀眾講嘢?慢慢我會學識,一個音樂會同大家近距離交流,我都用咗好多年去明白,講嘢都係分享。」

 

她又提到創作需要自律,死線(deadline)是很好的輔助:「(平日)唔想寫可以唔寫,但係要交歌啦喎,下星期要錄啦喎,監製催啦喎,自然就會做咩都諗住,有啲歌詞就係沖涼嗰陣諗出嚟,完全唔關沖涼事,但係佢就係咁出咗嚟。」

 

Ivana與延音學員們傾到不捨得離開,會後更被學員瘋狂集郵,學員又大讚她是頂尖唱作人。Ivana很享受與年青人交流,讓她回憶20年前的自己:「佢哋問嘅問題都係我自己絕大部份都有經歷過,我好想同佢哋講,既然你哋咁熱愛音樂、咁有天賦,唔好將佢變成自己嘅壓力,透過音樂去發揮自己係好幸福嘅事,希望佢哋可以繼續多啲創作。」但她暫不考慮開班授徒,現時仍然很享受創作,希望可以投放更多時間學習:「因為越學越覺得自己唔識嘢,越唔識嘢就越開心,好似大把嘢可以學,呢個係無間斷好似一世咁。」

 

回顧過去一年的工作,Ivana直言「真係好辛苦」,但認為辛苦是應該的,因為自己喜歡創作與藝術,並再次鼓勵學員們努力做好自己的工作。至於即將迎接入行20年,Ivana說:「等我數數先,今年應該係18年啦,不過呢兩年已經填滿晒㗎啦。」她透露今年目標是推出全新專輯、演舞台劇、舉辦香港及巡迴演唱會,但紅館個唱一直未有着落,只因申請多年仍未有期:「紅館Book場嗰度,全港九都知道啦,真係要睇吓第十幾次申請先有啦,呢個神聖嘅場地,都申請咗幾年㗎啦。」

 

香港遊樂場協會首個年度音樂企劃《MusicSus延音Bucking計劃》

現階段的十二組入圍單位,正密鑼緊鼓地進行街頭 busking 表演及相關演練。大會將於今年 2 月底公佈入圍的 4 個終期單位,並將於 3 月 14 日登上麥花臣場館,與專業評審及表演嘉賓共同演出,為「延音 MusicSus」完美作結。詳情切記留意大會於社交平台發佈的官方資訊。

 




「延音 MusicSus」終期匯演

日期:2024 年 3 月 14 日(星期四)

時間:7:30 - 9:30pm

地點:麥花臣場館

主題:起承轉合

表演嘉賓 : 林一峰(Chet Lam)、徐偉賢(Peco Chui)、周鍚漢(Randy Chow)及 JW 王灝兒

 

十二組入圍單位包括(排名不分先後):

櫻空 @sakurasoband_2020

王胤正 @ching_cover

林安晴 @bg.lock

是蛋糕 @sidangoofficial @nickel_lhc @lwcjaco

芬蘭fufu @alvalnm_ @haileyylee @henry_yg

Apricity @minnie_yuenting @swk_stephy @catthyy_ly

Katha @katha.1007

Pyros @pyyyrosss_ @kyyylieccc @_leunglokyin_

Sweatshop@_sweatshop_

Zita & Coco @muzita_852 @coco_heung

Rainbow Yu @yu.tung0127

Wong Wai Hiu @wwh.googoooooo

9 次查看0 則留言

Comentarios


bottom of page