top of page

溫拿樂隊全新單曲《由始至今》面世兄弟情緣份不變


溫拿樂隊聚首一堂炮製新作《由始至今》,縱使成員間有散有聚,不過由始至今兄弟情不變,並合力創造出溫拿時空,與樂迷一起走過不同歲月。

 

《由始至今》由譚詠麟,與B哥哥鍾鎮濤共同作曲,譜寫朗朗上口的旋律,再由校長填上真摯直白的歌詞,記下歷年來的心跡;最後兩段副歌的歌詞,更巧妙地加入溫拿不同經典作品的歌名,有《溫拿狂想曲》、《Sha La La La》、《追趕跑跳碰》、《千載不變》等等。歌曲尾奏部份,更加入色士風演繹經典金曲《友誼萬歲》的旋律餘音縈繞,彭健新都話:「最尾段色士風攞命呀!」

 

溫拿五虎齊人拍《由始至今》MV,特意挑選新界一個營地拍攝,原來五虎一路以來都未試過如此放鬆去玩,放下工作繃緊的心情。製作團隊更為他們準備樂器及音響系統,讓五位大男孩野外夾Band過足癮!他們興奮說:「以前圍住個營火,攞支木結他唱下就有,露營夾band真係第一次呀!」

 

早前因疫情關係,雖然溫拿五虎的工作進度有所影響,不過他們沒有停下腳步,期間已創作了多首歌曲準備面世。而首發新歌《由始至今》由校長與B哥哥合寫,兩位相當有默契,有次校長到B哥哥家中作客,說起要籌備新歌,很自然地B哥哥拿起結他,校長哼唱旋律,再將溫拿的點滴寫入歌詞,B哥哥說:「本身有諗過搵人寫歌詞,但係寫溫拿冇人夠我哋熟!」《由始至今》就此成形。

 

談到新歌創作,彭健新幽默說:「佢哋(校長與B哥哥)好好人呀!話『你放心,點都留番句你唱嘅』,真係得一句!哈哈!」健仔還即場唱兩句,校長敬他一句:「依家又唱到喎。」健仔再回:「我歌星嚟㗎嘛!」在旁的陳友再加一句:「我哋要上《中年好聲音》呀!哈哈!」

B哥哥又說:「編曲方面經歷咗好多波折,健仔話冇結他solo唔制喎,咪加多段俾佢啦,特別送俾彭健新嘅!」

 

拍攝現場笑聲不斷。阿強久不久才回香港,陳友想起以前叫阿強有個花名叫「豬頭強」,現在變成「白頭強」,校長笑言說:「佢個底係黑嘅,個面係漂嘅,幾有型呀!」阿強則說:「唔知係咪掛住香港,掛到頭都白埋。」

 

溫拿五虎玩得又有活力,陳友說:「我哋唔係好大啫,都係啱啱『登七』之嘛。人生七十唔係好多,但我哋仲可以仲壯壯健健,種感受真係好正能量㗎!」他續說:「今日唔知聽日事,有得唱就唱,開心就開心囉,一路踩落去,踩多30年夠唔夠呀?哈哈!」B哥哥表示這就是溫拿精神。校長說:「有人話過我哋好似一幅畫,有高有矮,有肥有瘦,係一個緣份嚟,可以將呢份友誼細水長流帶出嚟,可以融洽相處咁多年要好好珍惜。」陳友又寄語年輕一代:「啲年輕人成日問我點樣可以玩band成功,秘訣就係要溝通,有啲嘢傾下傾下就掂㗎喇!」



2 次查看0 則留言

Comments


bottom of page