旨在推動香港舞蹈及音樂文化的本地大型戶外舞蹈表演《Figure OUCH!》昨晚在西九文化區圓滿結束，由17位來自不同派別與舞種的導師與學員施展渾身解數，甫開騷即焫㷫全場。鍾舒漫（Sherman）、黎美言（Winkie）、王君馨（Grace）、衛詩（Jill）及吳嘉禧（Cheronna）5位熱愛跳舞的本地藝人亦與不同舞者聯乘表演。
昨晚全場氣氛high爆，有如大型跳舞派對，台上台下人人勁舞，Sherman、Winkie、Grace、Jill與Cheronna 5人以貼身黑衣舞服狂跳220秒，為《Figure OUCH!》掀起高潮。她們坦言有如此大型的跳舞騷不容易，大讚觀眾們的反應勁過紅館觀眾，又表示希望下年仍可以繼續跳。Grace更在台上表示：「舞者有時冇演員、歌手咁被尊重，好似淨係企喺側邊咁，但如果冇咗排舞師，大家睇開嘅跳舞MV出嚟嘅效果就冇咁好睇。」她寄望樂壇頒獎禮能設立排舞師獎，鼓勵一眾舞者。
她們騷後受訪時仍難掩興奮，Cheronna笑言等上台期間，多次忍不住衝出去欣賞：「原本應該乖乖地mark舞等表演，但係真係忍唔住，好開心。嚟緊我都會出歌，雖然唔關跳舞事，但係真係好想造跳舞歌，心好癢。」很久未有於台上跳舞的Jill說：「真係耐到我都唔記得，但係好掛住呢個感覺，希望香港多啲呢類dance show。」Winkie指這次的跳舞演出，令她們五人找回自己：「有時做娛樂圈，人哋叫你做咩就做咩，今次令我哋搵返個初心，做返最pure嘅自己。」
她們又希望未來的音樂頒獎禮，可以為舞者設立獎項，Grace話：「既然曲詞編監都有獎，其實好多演出同MV，排舞師都有好大功勞，外國都有好多關於跳舞嘅獎項，希望香港都可以有，相信對舞者係好大嘅鼓勵。」Sherman表示不少跳舞老師透過這次的活動，令他們找回跳舞的熱情。
舞者Lambo感謝大會讓她與學生有演出的機會，認同假如樂壇頒獎禮可以加入跳舞獎，是非常大的鼓舞，亦希望為舞者們成立工會：「一個人嘅力量好有限，有時都唔知同邊個fight，如果大家有同一個目標做就好。」另一舞者阿業感謝主辦單位：「同平時跳舞學校嘅showcase唔同，唔同舞種嘅dancer都聚埋一齊，真係為咗宣傳跳舞。」他亦希望可以有跳舞獎：「好似What's Good Music咁，係個好好嘅媒介向大眾推廣跳舞。」
對於香港現時更關注舞者，作為舞者的阿業希望改變dancer的地位：「始終我哋嘅話語權好低，有時反映咗都唔會被放喺好前去考慮，覺得『都係dancer啫』，甚至有啲dancer自己都覺得係咁。」他期望製作公司能與舞者、樂手協商：「如果大家簽咗agreement先，唔止係製作公司可以叫停嘅，香港嘅製作好忙，大家都可以小心啲，如果有協商，咁萬一有咩意外，都知大家事前已經充分考慮咗嘅。」