兒歌天后及全球華人傑出青年李紫昕Purple姐姐早前出席全港最大型課外活動教材及用品博覽2022暨課外閱讀文化節嘅活動，舉行了「紫昕有你mini show」及簽名會，吸引大批粉絲們到場支持，簽名會出現長長人龍，Purple逐一同粉絲們拍照留念，場面非常熱鬧!
Purple表示今次好開心，係第一次參加ECA EXPO，而「紫昕音樂世界」亦係首次參展，以往就經常幫參展商表演，今次自己有演出又可以帶埋自己學員演出，同埋自己又有個展位，對於自己嚟講係一個好特別嘅經驗，我啱啱完咗《花木蘭》音樂劇，又帶埋一班學員嚟演出，一齊嚟參展，成件事對我嚟講係好開心同好夢幻! 而今次呢個ECA EXPO展覽好多姿多采，有好多嘢試玩、試堂呀! 我覺得好集中，因為今年暑假好似好短，但係同學仔同家長們係呢個疫情期間，其實都好需要有唔同嘅活動同課程，所以我覺得呢度係包羅萬有！其實係呢個疫情真係唔容易，但係我哋都好努力，一齊同心抗疫，同時家長們都好努力為小朋友們搵唔同嘅課程去平衡身心靈嘅發展，無論係學業上、藝術上或者體育方面都好努力參與。
另外Purple提到完咗《花木蘭穿越神話》音樂劇後， 又即刻準備10月尾嘅音樂劇「台長奇遇記」載譽歸來2022版，今次會係荃灣大會堂演出5場，雖然呢個劇目係重演，但係喺劇本、服裝、音樂方面會加咗好多新嘢，保證到時會比大家一個新驚喜。
