由九位青少年組成、電影《狂舞派》演員奶茶劉敬雯擔任教練的本地街舞青少隊伍FUNKY HEOROES於7月底遠赴美國洛杉磯參加世界舞蹈大賽《World Of Dance》國際總決賽2024，躋身青少年組的TOP 5，位列日本、美國及中國等世界級強隊之前，並於成年組青少年組混合賽的最終決賽中勇奪TOP 10，寫下目前香港舞者的最佳紀錄，為港爭光！
《World Of Dance》世界舞蹈大賽是全球最大的舞蹈巡迴賽，自2008年初創以來吸引逾千個世界各地上的舞蹈團體參加，其知名度與認受性堪稱「舞蹈界奧運」。是次赴美參賽，是奶茶及FUNKY HEROES多年來的夢想，他們更是整個比賽中唯一一隊純街舞團，可見其實力非凡。
FUNKY HEROES是2015年成軍的香港首隊少兒街舞團，專門跳街舞Locking，創辦人兼教練是資深Locking舞者奶茶。團隊於本港舞蹈比賽，早已奪得超過20場的冠軍，亦曾於2019及2023年贏得《World of Dance》香港決賽青少年組冠軍。
一手湊大FUNKY HEROES的奶茶，對是次能成為世界青少年舞團的TOP5，既感動又感觸：「我哋真係用街舞打入《World Of Dance》啦！其他地區每隊有成20個人，我哋係9個人咋，真係好唔容易，我覺得佢哋同我自己都好叻，哈哈！」為了比賽，FUNKY HEROES的九位團員付出了半年時間，進行密集式訓練，同時間亦要兼顧學業，奶茶說：「撞正考試期，有啲團員要考呈分試、有啲團員讀中三要揀科，所以佢哋自己都好大壓力、好緊張。但係大家嚟到練舞，就會見返佢哋眼中嗰團火，講真，我自己好辛苦嗰陣，都係諗返呢啲畫面去繼續做。」
除了學業的壓力，舞蹈如所有運動一樣，需要投入大量時間練習，九位團員從未缺席訓練，展現讓人鼓舞的決心與毅力。奶茶憶述訓練期間團員的經歷，有人跳到嘔、有人跌倒：「有幾個女仔比較遲入團，為咗追返啲時間，要不斷咁苦練一個轉身動作，冇軟墊都照練，中途會係咁撻落地，撻完吸啖氣，忟一忟又再做，我自己睇到呢啲畫面係眼濕濕嘅，佢哋嗰份堅毅同埋好想做到件事嗰團火，係令我好動容。我都會問自己，14、5歲嗰陣有冇咁硬淨呢？」
除了苦練舞技，資金幾乎是每位舞者需要解決的問題，奶茶直言由於要自費到美國比賽，其中有來自基層家庭的團員：「係困難㗎，唔係每個家庭都負擔到，所以都要想盡辦法，睇吓點樣呢度減啲、嗰度減啲，用咗好多方法先成到事。」
作為教練的她，經常被FUNKY HEROES團員間的愛所感動：「佢哋真係感情好好，唔係跳完就講拜拜嗰啲，係會互相扶持。自問呢個年紀嗰陣都唔係好多朋友，見到佢哋覺得自己細個做唔到嘅嘢，真係喺佢哋身上實現咗。」奶茶更坦言曾經覺得電影《狂舞派》的宣傳金句「為咗夢想，你可以去到幾盡？」好鬼老套：「但係見到佢哋咁努力去追呢個美國比賽夢，令到我都有返團火。雖然我已經好多傷患，唔可以再比賽，但係我會用自己嘅十成功力推佢哋上世界舞台！今日，我哋做到啦！入到TOP5大家都嚎哭，雖然有人會覺得五強啫，又唔係攞第一，但係中間真係好不容易，個個都係喺香港高壓環境下成長，真係好叻！我都會繼續將呢個『狂舞』精神傳畀佢哋！」
奶茶特別感謝男朋友的支持，以及好友Lokman楊樂文的打氣：「之前FUNKY HEROES同佢拍咗《如果電話亭》個MV，我已經好多謝佢，讓呢班小朋友得到呢個咁好嘅經驗，今次Lokman開緊工都拍咗條片幫我哋打氣，真係好感激佢！」她笑謂為FUNKY HEROES排舞期間，好擔心自己排的舞步不夠好：「因為排舞佔一半以上嘅分，真係好擔心我會拖累佢哋，試過喺男朋友面前爆喊，不過原來盡力做就得㗎啦，今次入到五強，已經好好。希望將來有更多隊伍能夠參與國際賽，因為香港舞者、年青人甚至小朋友，真係做得到！」
FUNKY HEROES 簡介
香港第一隊少兒街舞團，專攻街舞Locking，團隊創辦人及教練是香港資深Locking舞者，電影《狂舞派》演員「奶茶」。2015年成立以來，獲得超過20次本港舞蹈比賽冠軍。團隊亦分別於2019年以及2023年贏得World of Dance香港決賽青少年組冠軍，分別於2019年及2024年，兩次代表香港前往美國參加World of Dance國際總決賽。除了活躍於舞蹈比賽，Funky Heroes亦被邀請參與不同的演出，包括Mirror隊長Lokman 歌曲《如果電話亭》MV演出，《Chill Club頒獎禮2024》演出，《C ALL STAR 集合吧！》紅館演唱會等等。
FUNKY HEROES練習花絮REELS
Commentaires