top of page

陰陽眼「鬼后」關寶慧接受潘紹聰新城《恐怖熱線》訪問18歲開始靈體纏身 「封眼」無效最近一次被50年代打扮男人咬手臂


「鬼后」關寶慧(Emily)日前 (8日) 接受潘紹聰主持的新城《恐怖熱線》訪問,天生有陰陽眼的Emily經常遇到靈異事件,她透露首次遇見靈體,是18歲那年在泰國曼谷某酒店發生,嚇得她三魂不見七魄。


Emily透露當晚三個女生一間房,本來相約好另外兩位友人睡前玩一會兒撲克,開始前Emily先上廁所,數分鐘出來後,發現兩位友人經已熟睡,她於是上床準備就寢,「我一瞓落床就郁唔到,眼尾見到隔離床頭有個着白色袍嘅女人,坐咗喺我朋友枕頭旁邊,真係勁驚,我全程都郁唔到,過咗至少10分鐘先郁得番。」


由於經常看到靈體,Emily既害怕又煩厭,於是找來師傅「封眼」,可惜數年後偕友人到卡啦OK消遣,又再次看到靈體,今次更與玄學家司徒法正齊齊目擊,「嗰間卡拉OK房我已經去過好多次,突然間喺飛鏢位有個頭飛出嚟,師傅都見到,係一個好老嘅阿伯,好瘦、好猙獰。」

近年活躍於舞台劇的Emily,演出期間亦發生過怪事,「有日我喺化粧間化粧,喺頭頂突然有叠溪錢跌落我個頭,現場所有人呆咗,好恐怖,後尾佢哋安慰我係道具,但點解化粧間會有溪錢道具喺到?」


訪問去到中途,司徒法正接受潘紹聰電話訪問,他憶述某年和Emily到曼谷拍攝節目時遇到的靈異事件,「Emily原本住尾房,我間房就對正電梯,後尾佢同我調咗房,第二朝起身我張床多咗8個枕頭,第二晚瞓瞓吓就喺我旁邊跳,跳足幾晚,我係師傅,又唔能夠換房。」而Emily雖然換了房,但也未能避免,「我用門咭開門時,突然右手邊有團綠色光,見到一個同我一模一樣嘅人,嚇到我腳都軟。」


另一單出埠發生的怪事則在馬來西亞,當時Emily住在海俊傑隔離房,凌晨時份洗澡時,突然聽到一把清晰的男人歌聲,但聽不明對方的語言,「我衝出去用酒店房電話打過去搵海俊傑,佢好遲先接電話,問佢係咪唱緊歌?佢話瞓緊覺,我即刻收線九秒九衝上床,一上床就聽到男男女女幾廿種方言,嘈到好似街市咁,之後念經、講晒粗口都唔掂,搞到我四點幾,但我五點就要起身開工。」


Emily的靈異事件愈講愈多,其中一單更發生在她香閨,「我依家間屋住咗十幾年,一直都冇嘢,半年前一晚我痛醒咗,有嘢咬我手臂,係一個50年代打扮嘅男人,梳住個飛機頭,着白恤衫西褲,我見到佢咬我左邊手臂,成件事好似發夢,但又好真實,後尾我問個相熟師傅,佢話係我以前啲冤親債主,唔抵得我今世唔使做,所以咬我,但其實我只係懶,唔係唔使做,太誤會我喇!」

8 次查看0 則留言

Comments


bottom of page