top of page

新城體育會羽毛球隊昨晚(8日)再出動施匡翹、黎展峰、張明偉、黃嘉麟朝聖羽毛球高手馬浚偉齊齊出身汗又互相了解


新城廣播有限公司首席營運總監馬浚偉先生成立的《新城體育會》,日前(8日)再次舉辦羽毛球活動,新城廣播知訊台台長程凱欣、新城體育會組長思敏,與歌手施匡翹(Zaina)、黎展峰、獨立樂隊Charming Way主音張明偉及隊友黃嘉麟切磋球技,齊齊出身汗之餘,繼續在運動中互相深入了解。


馬浚偉看到張明偉和黃嘉麟即表示有留意他們的樂隊,令二人開心不已。面對幾位幹勁十足的男生,馬浚偉輕易而舉將他們逐個揮低,開波期間,馬浚偉對住張明偉表示:「我玩音樂冇你哋咁叻,但打羽毛球就唔同。」眼見張明偉被自己打得落花流水,頻頻彎腰執波,就連鞋帶都甩埋,馬浚偉笑笑口說:「你諗住綁鞋帶拖延時間?」張明偉也忍不住大笑。


張明偉事後大讚馬浚偉:「一直都知道馬生係羽毛球好手,喺電視台未有機會合作,終於可以同馬生打羽球,梗係要嚟朝聖,我哋行內他好有名,打得好好,成個選手咁。我細個有玩羽毛球,但稱唔上叻,今日嚟捱吓波打,出身汗大家都開心。」張明偉又大談近況,他指最近正積極籌備6月推出的新歌及拍攝MV,新歌主題則講生死:「人離不開生老病死,或者朋友移咗民,有好多離別,雖然慢慢會習慣,但都要抒發情緒,所以就創作呢首歌鼓勵身邊人。」


不過對住曾合作勵志劇《我們的畢業禮》的Zaina,馬浚偉明顯鍚住對方,大讚她:「都接得住個波喎!」自言中學已經沒接觸過羽毛球的Zaina,透露比較喜歡瑜珈和跳舞,她表示:「我記得拍《我》劇時,有一場戲係同馬生、湯寶如前輩一齊打羽毛球,重拾番感覺。」提到運動,Zaina試過因跳舞而受傷,最後更要退出表演環節,她說:「我係臨表演時練習,練練吓聽到大髀位置啪一聲,教練話我條筋裂咗,我當時仲擔心以後跳唔到舞,休養咗差唔多一個月先復原。」



0 次查看0 則留言

Comments


bottom of page