「靚聲王」張偉文愛徒方俊將於下周一（15日）在北角新光戲院舉行《燃亮愛演唱會》，處男演唱除了滿足fans需求外，更希望用歌聲為視障人士燃點希望；用行動燃亮對視障人士關愛，故優先送出門票給視障人士及其家屬前來一齊happy。當晚方俊給予視障人士發揮才華平台，將與香港盲人輔導會轄下The Cheers 樂隊合唱《We Can Overcome》。
日前方俊跟視障嘉賓到band房綵排，雖然視障嘉賓睇唔到，但每聽到方俊嘅聲音及親切握手及搭膞頭舉動就歡喜若狂， 呼喚他做方Sir，大讚方Sir有男神聲線，唱得好好聽，好期待當晚演出及做觀眾。傷健鼓手仲興奮得對住方俊說：「方Sir，你覺得我打成點呀？」方俊則送上鼓勵，𠱁得對方開心笑不停，自信心返晒嚟。方Sir也跟他們互動，叮囑合唱佢哋嘅「飲歌」時，記住睇返住他呀！對於能成就一班視障人士發揮才藝，方俊覺得好有意義：「佢哋好似識到一位志同道合嘅新朋友咁好興奮，我答應喺演唱會後，買蛋撻去協會探訪，大家傾吓偈，唱吓歌，佢哋好需要關愛。」
方俊一直為新加坡歌后麗莎做義務經理人，
大家感情要好，今次方俊個唱，麗莎亦會以神秘嘉賓身份助陣，而麗莎在港開騷，方俊亦做表演嘉賓，兩人互相幫助。另外，目前方俊為演唱會綵排得如火如荼，表演嘉賓方麗盈及王美蘭日前排練後，「屈」方俊請食大餐，麗盈笑說：「要魚翅撈飯，鮑魚洗面！」美蘭就唔蝕底要求食花膠！難得請到兩位「姐姐」幫手，方俊賣口乖說：「得得得！請食花膠冇問題，至為鮑魚就揀啲大到可以抹車嘅。」