top of page

劉松仁罕有受訪:我自己行緊最後階段,其中一個就係《利瑪竇》音樂劇《利瑪竇》三度公演 兩大靈魂人物暢談合作經過恩師變好兄弟 松哥笑言將下半生交畀王梓軒



殿堂級演技達人劉松仁,2019年首次為音樂劇《利瑪竇》執導,他形容當時「乜都唔識」,但受相識六十載的神父恩保德(Giampietro)所托,硬着頭皮接受「任務」。至今《利瑪竇》演出共20場,今年4月將於香港文化中心三度公演,由劇本、演員、音樂、舞台設計及服裝等等,均由松哥親自育成,他揚言:「我擺晒我自己落去,我自己行緊最後嘅階段,裏面其中一個就係《利瑪竇》。」

 

日前,松哥以導演身份聯同男主角王梓軒齊齊受訪,是次三度公演更加入數十人管弦大樂隊及100位中學生參與演出,梓軒說:「自從上兩次公演之後,我哋有機會同唔同學校交流,所以松哥趁今次畀多啲學習嘅機會佢哋,先有呢個合作。」至於管弦樂部分,松哥坦言向來有這個概想,只因冇錢未能成事:「而家機玄巧合邀請到現場演奏樂隊,我希望觀眾可以更加投入,享受成個戲嘅精神。」另外,由於主導音樂劇《利瑪竇》的恩神父去年離世,松哥透露將加入紀念環節,大讚對方為香港貢獻良多。

 

問到為何會執導傳奇人物利瑪竇的音樂劇?松哥笑稱「好奇怪」,雖然與恩神父深交多年,但對方從未邀請他作任何演出:「佢知道我唔係好做教會嘅嘢,因為我好怕hard-sell。」10年前,恩神父首次邀請松哥演出舞台劇《流芳濟世》,原本已有4齣戲在身的他,根本冇暇演出:「點知4部戲都同我講要延後,咁我冇得推啦,於是就開始第一次同佢合作。5年後,佢叫我做導演,我乜都唔識,好彩有好多人幫我,第一個我就搵梓軒,嗰時乜都未有㗎。」

 

過程中,松哥專心一致做好準備,從未為身負重任而產生壓力,他說:「Journey!旅途就係你不停咁行,只要你肯行,你就會逢遇,咁你就會一路行落去。」相反被松哥點名做男主角的梓軒卻「壓力山大」:「松哥初初叫我研究個戲,我榮幸之至,但係松哥叫我演利瑪竇,我係好耐都冇答應。好大壓力喎,我何得何能?後來就係行咗先,最重要唔係我或者我嘅感受,最重要係件事喺大家心入面有個影響。」

 

梓軒感激由籌備至演出期間,松哥經常指導他,同時亦令他更相信自己:「如果安排咗大家一齊做,而你覺得自己唔值得,你係嘥咗人哋時間,係唔可以容許呢樣嘢。松哥提點我,我係用個好感激嘅心,如果佢唔提我,我就好驚㗎啦,即係冇得進步。」他更分享過程中最大的得着,遇到問題不應該視之為「障礙」而是「練習」:「有問題,即係你要去解決,呢個係令你向前嘅,但係你當問題係一幅牆嘅話,就會好怯,你會企咗喺度。」

 

《利瑪竇》的旅程的確充滿美麗的相遇,先有王梓軒,還有女主角陳潔儀(Kit)。松哥用「得意」形容Kit的加入,他透露原本已經有女主角:「個戲由業餘變咗職業,監製叫我搵個再有份量啲(女主角),我話唔得,人哋喺我最艱難嗰時答應我。」最後,原定的女主角主動辭演,於是松哥找來鄧卒雯:「點知佢話你唔應該搵我,佢就介紹佢好朋友阿Kit。」松哥更隆重其事親自飛往新加坡與Kit接洽:「講晒成件事、講劇情,講咗幾個鐘,咁佢去廁所,佢話喺廁所聽到首歌,好似有把聲話『你要做呀』,嚇到佢即刻應承我,好好笑。我直頭覺得係神蹟!」

 

至於劇中梓軒要從20多歲的利瑪竇,一直演至50多歲,期間涉及多個造型的變化,最令觀眾們驚喜的,是梓軒將乎從未離開舞台,但卻在短時間內轉換多個造型。兩人笑住表示是他們的magic(魔法)。談到排練過程,梓軒指松哥每次都加入一同練習,即使還未正式綵排:「嗰啲即興練習都好,所有嘢松哥都一齊玩,嗰刻有冇劇本都好,成個團隊就已經喺度。」

 

松哥坦言非常享受創作與排練的過程:「真係好有力量,我哋演電視,係透過電視打入觀眾個心入面,影響你,舞台劇係成班一齊影響啲觀眾,好一致,好強勁嘅能量。每次我都睇到喊,唔知點解好感動。」雖然如此,松哥卻從未想過參演其中:「我淨係想做觀眾,我唔鍾意演戲㗎,講出嚟都好笑,我唔係享受演戲嗰啲人嚟。(但係你演咗40年喎?)係呀,唔通唔使食咩?哈哈哈。」梓軒此時突然爆小秘密,指《利瑪竇》有機會以演唱會形式呈現,屆時有「利老竇」(利瑪竇爸爸)的角色,至於角色誰屬,請大家自行猜想。

 

梓軒經常稱松哥為恩師,但兩人的相處更像「好兄弟」,訪談期間有講有笑而且默契十足,問到松哥是否視梓軒為Buddy?他大笑說:「我唔理呀,我下半生交咗畀佢!」身旁的梓軒笑到差點掉在地上。近年在幕前甚少見到松哥,他更坦言不會再接戲,只因所有心思擺到《利瑪竇》上:「我冇(其他)計劃,我擺晒我自己落去,我自己行緊最後嘅階段,然後裏面其中一個就係《利瑪竇》。」對於早前傳出他身體欠佳,松哥大笑回應:「我嘅狀況點,讓你哋話畀佢哋聽。」

 

梓軒指松哥的精神力量非常強大:「佢一入間房係好似空氣靜止咗咁,然後嗰條虛構嘅紅地氈就出嚟。」松哥聞言表示,從電視台年代學習到何謂「壓場」,又指過去自己太嚴肅:「後生嗰陣我好嚴肅,因為好集中諗緊點演點演,直到有次我同陳玉蓮拍嘢,佢啱啱相反。佢一入廠『點呀你哋?』好開心嘅,我嗰時學到嘢。於是,我以後返屋企見到阿媽就要笑,嘩,好有力量,我係假(笑)㗎,啲肌肉硬㗎,我唔理我E(E起棚牙),E到我真係有個笑容出嚟,母子關係產生幾大變化。以後同人傾偈傾咩都畀個笑容先,遲兩秒講都得㗎,呢樣好嘢,唔好睇少笑容。」

 

松哥對演藝事業如此投入與熱愛,是否永不言休?他說:「唔理咩圈,我後生都講,無論我掃街又好、演戲又好,做咩都好,都係服侍我學習做人,所以喺邊個環境都無所謂。」

 

音樂劇《利瑪竇》2024重演

日期:2024年4月20日、23-27日(夜場)

2024年4月21及28日(日場)

地點:香港文代中心大劇院

 

場地提供:香江花月

王梓軒、劉松仁服裝贊助:SHANGHAI TANG上海灘


往年劇照


24 次查看0 則留言

Comments


bottom of page