top of page

藍奕邦2023年第二首新曲《命》 為前路感迷惘的人打氣


醞釀六年,藍奕邦終於在今日(12日)推出這首對他尤關重要的《命》作為2023年第二首全新單曲。歌曲創作追溯至2017年於加拿大休養的藍奕邦,當時無論是身體還是情緒亦處於低潮期的他,重返舞台可謂相當遙遠,但是《命》的出現,成了他的最大鼓勵。藍奕邦說:「嗰陣聽歌大聲啲都耳仔痛,講句嘢又無氣,何況唱歌?但係我同自己講,要趁呢段時間寫定一、兩首好勁嘅歌,第日可以復出嘅話都有首歌袋住,就係咁寫咗《命》,寫完我就安心,因為佢真係我最好嘅旋律。」藍奕邦笑言這個旋律是他激勵自己的「紅蘿蔔」:「我好似隻驢仔咁追住『佢』,鼓勵自己好好休息、調整,因為我點都要好返出到呢首歌!」


情緒低谷的經歷,往往不足為外人道。藍奕邦曾經如許多人般,認為自己的際遇是個宿命,但他不願服輸,不想自己敗在所謂「命運」之中:「我覺得好多經歷迷惘期嘅人,都聽過唔少呢啲說話,咩『性格決定命運』、『你自己搞成咁』。我只係想講,命不該絕,唔好輸畀所謂嘅『宿命』!我每日好努力逐少逐少爬返出嚟,就係唔想輸畀我條命!」確定旋律以後,他立即邀請林夕為歌曲填詞,藍奕邦說:「我覺得只有佢先可以駕馭呢個歌名。」


除了是為自己「打氣」,《命》的意義在於突破命定論,藍奕邦說:「我覺得命運係一個概念,根本冇人真正知道人哋條命會係點,信命只係乖乖接受現實嘅代名詞。如果人人都信命、墨守成規,好多創作甚至新科技都唔會出現。」他深信沒有人可以預測命運,既然如此,何不勇敢地創造自己的人生?他說:「如果我當年真係信命,咁我應該冇可能出返嚟唱歌,繼續渾渾噩噩過埋下半世。」


《命》正好與去年推出的《生》組成藍奕邦對生活的看法:「呢幾年嘅經歷,令我對生命有種全新嘅感受,好想同大家分享呢份體會。2021年我生日嗰日(5月15日)收到林夕份詞,咁啱早幾日我又填好《生》,兩份詞剛剛好呼應到對方,好開心。」從而繼《生》之後,就有《命》這首歌。


他坦言2021及2022年亦曾經考過推出,但又覺得還未到最好的時候,直到現在復出剛好兩年,藍奕邦才有信心傳遞《命》的意思:「首歌係為自己而寫,同時我都係為大家打氣,之前我都未有信心演繹《命》嘅內容,因為它嘅意義好深、好大,要好有『力』同『悟性』先表達到。呢個『力』唔係來自聲音,而係精神上嘅『力』同『承擔』,嗰份詞,我足足消化咗兩年先真正明白箇中嘅意思,自己用indie label嘅形式行咗兩年,又開返個個人騷,先有信心出《命》。」藍奕邦及周國賢、Goro Wong聯合為《命》編曲及監製,他透露過去兩年曾幾次錄音卻未如自己所想,最後用了比較沉著穩重、鏗鏘有力地講佛偈的唱腔,才大功告成。


藍奕邦以《命》寄語遇到人生交差點,對前路感到迷惘的人:「可能好多人同你講,唔好同命運對抗、唔好同條命鬥。希望你聽完首歌,會記得返自己嘅聲音,順從返自己嘅意願,唔係叫你同個天作對,而你只係同嗰啲以為自己係神嘅人作對。」


藍奕邦邀得朱栢謙參演:「我好多年前已經係佢Fans,好鍾意睇佢做戲,呢個MV我需要一個有成熟陽剛味,同時又感性嘅人去演,我就諗一定要朱栢謙!」雖然兩人只有在社交平台私訊過,幸得朱栢謙二話不說答應,兩人更與導演阿爛一同開會構思MV內容。


既然《生》之後,就有《命》,MV的構思亦以兩者作個對比,造就這回「潔淨」的感覺,以教堂作MV故事的背景,促成莊嚴牧師與懦弱助理牧師的角色,描述兩者互相角力的故事。並非演戲出身的藍奕邦自嘲演技平平,幸好有朱栢謙:「我同過好多好勁嘅演員拍嘢,不過啲經驗就唔太好,佢哋會有意無意令我覺得自己演技好垃圾,愈做愈冇信心,但係朱謙令我好自在,搞到我好想再做多啲戲,佢真係呢個MV嘅不二人選。」朱栢謙亦感謝導演及團隊:「感謝由心而發的音樂及歌詞,我愛藍奕邦。」新歌《命》的官方MV將於明晚(13日)十時推出,密切留意!
















《命》

2023.10.12 (四)

HKT 00:00 各大串流平台上架


2023.10.13 (五)

HKT 22:00 MV於YouTube上架


主唱、曲:藍奕邦

詞:林夕

編/監:Goro Wong/周國賢/藍奕邦


出生差錯腳學會怎行路 怎麼踩過界由誰來主導

什麼主宰個性讓世間難做 我替我算命測出苦海虛無

天有天替他行道 抑鬱逼我會自保

總要將這一條命活到好

灰到黑眼中無路 心中方向會步操

背上的行囊 也輕於鴻毛

蟻習慣低頭 人情願跌倒


遺傳什麼基因先會嚇醒

誰又被逼天生膽平命正

無懼面相差 怕的只是鏡

未能認的別承認 不是命

為懸命不懼貧病 不認命


不信因鈣質流逝 摧毀骨氣要跪低

敲碎這脊椎難道會跛

驚膝蓋酸軟的奴隸 注定認誰為上帝

彳亍於爛泥 腦沒法被洗


遺傳什麼基因先會嚇醒

誰又被逼天生膽平命正

無懼面相差 怕的只是鏡

未能認的別承認 不認命

為懸命不懼貧病 未曾驚


遺傳什麼基因先愛血腥

誰人樣子天生不能入鏡

誰話運氣差 去他的話柄

未能認的別承認 不認命


各有各會拼命貓狗都有叫聲

各有各怨命都將尊嚴亂掟

垂頭望廢水 照的不是鏡

未能認的別承認 不是命

病人預測運和命 為何聽

病還病不懼貧病 不認命

11 次查看0 則留言

Comentarios


bottom of page