＠ngyika #YIKA #吳爾珈 #YIKA_仲夏夜之夢
2023年樂壇新人吳爾珈（Yika），由YouTuber躍升到獨立唱作歌手，她的「明星夢」並非玩玩吓，來到第二支派台單曲《仲夏夜之夢》，繼續為自己寫歌，唱出她的心中所想。「喺韓國娛樂公司SM Entertainment做完練習生返嚟，我一直喺夢想同現實之間做唔同嘅抉擇。家庭、學業同愛情對我嚟講都好重要，但係為咗成為真真正正嘅歌手，我都放棄咗好多嘢，不過我覺得呢啲都係令我成長嘅經歷，呢啲抉擇更成為我一定要成功嘅動力！」
《仲夏夜之夢》談的正正是Yika的心聲，為了追夢放棄了夢幻般美好的初戀，雖然可惜，但這份情誼成為彼此繼續作夢的動力，兩個人相知相扶，為對方的成功而驕傲，更是難能可貴。新歌的曲風温和輕快，為強調音樂的夢幻感，用上不同的弦樂編曲豐富背景，還有清新的風鈴聲效，成為這着涼快、輕盈而甜美的樂章。Yika說：「《仲夏夜之夢》比之前首《戀愛駅》再甜啲、輕快啲，因為呢個夏天太熱啦，我想造首清涼感嘅歌，幫大家降降溫！」
Yika邀得新晉演員黃俊傑（JK）擔任《仲夏夜之夢》的MV男主角，他曾參與ViuTV劇集《繩角》拍攝，當中與江熚生AK對手戲，獲導演大讚他演技不俗。這次Yika獲JK力撐飾演小情侶，她笑謂：「大家都會有啲親密動作，鼻貼鼻之餘仲要錫錫，我真係超級緊張，好彩有佢帶我入戲，所以到roll嗰陣好快就代入當咗JK係男朋友，回憶起真係拍拖時好sweet嘅感覺，嘻。」故事的前半部分，講述兩人於小島裡相戀，初次牽手、擁抱，到熱戀時互相依偎、親咀。Yika為了鼓勵準備籃球比賽的JK，溫馨地在男方的掌心寫上「世一」，及後這個「世一」更成為這對小情人之間的「愛的蜜語」，整個畫面盡是粉紅泡泡，洋溢初戀的甜味。
故事的後半部分，Yika為了音樂夢、JK為了籃球夢各自努力，戀愛的甜度卻被悄悄沖淡，最後兩人選擇了帶着祝福放開對方，成就各自的夢想。雖然告別了愛情，但是兩人依然期待成為夢想中的世一「叫世人去拜服 你要更好」，互相共勉。
Yika感謝JK及整個團隊的參與，「終於完成第二首派台歌，成件事真係好夢幻。個MV我哋特登去咗坪洲拍，雖然有啲趕，不過好似成班人去渡假咁，拍嗰日仲要好好天，啲景真係特別靚，完全做到我想要嗰種sweet sweet嘅夢幻感，辛苦晒大家幫我完成呢件事！雖然《仲夏夜之夢》個故仔係甜中帶啲啲苦味，不過好多人嘅愛情都未必可以去到終點，反而成為好好嘅朋友，我覺得呢份情仲難得！」
<仲夏夜之夢Reverie>
2023.07.17 電台首播
2023.07.21 各大音樂串流平台上架
2023.07.24 Music Video 6PM HKT
2023.07.25 劇場版微電影 6PM HKT
<仲夏夜之夢Reverie> Official Video :
Yika instagram:
