藍奕邦與好友鄧小巧完成音樂會《We Are Home》後，決定給自己放個假回回氣，期間他到英國及台灣探訪近年移居當地的朋友，新歌《情定唐人街》正正由此而來。藍奕邦憶述年初在倫敦唐人街，看到滿街紅燈籠：「《情定唐人街》嘅verse又喺我個腦入面跳出嚟，其實呢個melody幾年前己經縈繞喺我個腦入面，因為太小調都冇諗過要做或者畀人，直到嗰日喺唐人街，我問自己，真係要出隻咁『娘』嘅歌？」
以小調比喻唐人街 讓時間停留在昔日情懷
「小調」、「唐人街」、「移民」三個關鍵字突然在藍奕邦腦海串連起來：「我諗返起30幾年前嘅移民生活，你會發現好多人移咗民之後，對香港嘅印象就停頓喺佢哋走嗰刻，同唐人街咁多年都係嗰種情懷好似。大家好拼命用好有限嘅資源，拼湊好東方色彩感覺嘅嘢，不過又點睇都覺得流流地咁。雖然係咁，但都係想為自己建立個安全區，唔使理外面係點，安心匿喺自己嘅世界，安安樂樂咁過日子。」這次他的英國和台灣之旅，與移民不久的朋友重聚，藍奕邦見各人的生活亦算安定下來：「見佢哋幾好個心都安樂啲，不過都有一種，佢哋仍然停留喺走嗰刻嘅香港嘅感覺，係有少少脫節同跟唔切，但係佢哋又perfectly fine嘅，係一種舒泰。」藍奕邦想為移居外地的香港人寫首輕輕鬆鬆、開開心心的歌作為祝福。
《情定唐人街》是小調曲式，對於小時候經常聽鄧麗君的藍奕邦，要寫小調完全無難度，他笑言自己有寶島流行曲情意結：「首歌係去台灣嗰陣寫好，喺台北成個氛圍都好啱，所以好快就完成。」新歌講述與愛人不問世事雙宿雙棲的美事，由林夕填寫，首段歌詞提道：「紅袖添香要安靜繁榮 遊蕩一街已驚擾全城 能讓我們長留在這家園 要牽手報讀家政」有點甜蜜、有點古典、有點怪誕亦有點優雅的筆觸，正是藍奕邦要呈現的輕鬆玩味：「因為嚟緊我會再出一首林夕幫我填嘅歌《命》，嗰首係《生》嘅姊妹作，所以我又再邀請佢幫我填埋呢首《情定唐人街》。當時我淨係畀一個諗法佢，就係認真做傻更更嘅事，佢真係完全明我想表達咩。」
編曲邀得早前為王嘉儀製作《自然變態》與《淹悶》的Hirsk及Voel，加上曾為藍奕邦做混音的Shelf-Index，讓《情》不單是充滿懷舊風格的「老歌」，而是趣味、型格兼備的「新歌」。藍奕邦指Hrisk與Voel年紀比較輕，對小調沒甚概念，但這反而是最好玩的地方：「三條玩電子音樂嘅佬，走去造一首小調歌，真係好痴線。」
懷舊寶島風由音樂延伸到MV拍攝 藍奕邦着喇叭褲跳老舞
日前，藍奕邦已為《情定唐人街》拍攝MV，穿上綠色西裝加闊腳喇叭褲的他，遊走於「師奶」造型的舞者當中，錄影帶、大牛龜電視、膠圍裙、豹紋衫、碎花衫褲，重現7、80年代的「娘味」。為徹頭徹尾的寶島風，平日罕有跳舞的藍奕邦更首次為MV排舞：「今次係我第一次拍MV要排舞，上次做騷同排舞師Valerie Lui合作得好愉快，所以又再邀請佢。我呢次要飾演好似劉文正、費翔嗰種7、80年代嘅台灣歌星，好有自信又風度翩翩嘅氣質，所以特登叫Valerie要教我「跳老舞」，keep住嗰種『最娘』嘅舞步，佢都即刻明要點做，大家一路排一路笑，我哋玩得好開心。」
除了「娘味」甚濃，婚姻關係亦是《情定唐人街》的重點，因此藍奕邦特意製作巨型紅色雙喜紙飾：「我要攞住張摺櫈『車』埋個囍字度，好有舊式江湖片嗰種感覺。結婚對於我嚟講，就係咁樣嘅一回事，有啲人嘅婚姻睇落好華麗、好無堅不催，但係真係要面對衝擊嘅時候，有幾多伴侶可以抵得住？套用返移民嘅心情，其實想喺另一個地方，安安穩穩建立自己嘅安全區，唔使理出面個世界同時間流逝，無論經歷幾多風雨，我淨係想同愛嘅人一齊簡簡單單生活，咁樣係一種福氣，我覺得呢個係每個人嘅選擇，希望呢首歌可以畀佢哋一啲歡樂、一份祝福。」
除了新歌面世，趁世界各地已經完全通關，藍奕邦正計劃衝出香港，到不同地方舉行巡迴演唱會：「去邊就畀我賣吓關子先，講返呢首《情定唐人街》其實都係為咗tour而準備，希望到時可以喺唔同地方同大家一齊唱，到時一齊進入藍奕邦嘅安全區，開開心心、輕輕鬆鬆享受一晚音樂，袋住呢份力量，喺世界各地好好生活。」
新歌昨日(31/5)於各大串流平台上架，MV將於昨天8時於藍奕邦YouTube Channel 正式發佈，密切留意！
《情定唐人街》
唱：藍奕邦
曲：藍奕邦
詞：林夕
編：Hirsk / Shelf-Index / Voel
監：Hirsk / Shelf-Index / Voel
紅袖添香要安靜繁榮
遊蕩一街已驚擾全城
能讓我們長留在這家園
要牽手報讀家政
情像酒家靠仿舊馳名
人像新聞有幾多長青
惟願我們名字像對春聯
對得久遠便相稱
混世不知有秦漢
只聽過秦漢 映畫翻映再映
歲月於這裡暫停 蝸居中寫食經
重拾不變心情 重蹈不變風情 如外邊風聲吹不應 應該繼續高興
情是金曲你早是名伶
情定一生會一世時興
來讓我們停在上個紀元
你想心醉便飲勝
混世不知有秦漢
只聽過秦漢 映畫翻映再映
你若早知道劇情 我也擅長算命
重拾不變心情 重蹈不變風情 如外邊秋風吹不應 春風滿面圍爐 來做春茗
情是金曲你早是名伶
情定一生會一世時興
來讓我們停在上個紀元
你想心醉便飲勝
有污清聽便不聽
還在唱著情共永
再不驚我們轉性