國際學校搶先開學 趙哲妤(Uny)做柴可夫送5歲女返學



受疫情影響,今年的暑假時間唔同咗,部份國際學校更巳放完暑假,搶先開學。今日(12日)藝人趙哲妤(Uny)就特別請假,一朝早就做柴可夫車囡囡(小魚)返學。5歲嘅小魚今年升一年級初班(等同本地校制K.3),正就讀九龍塘嘅美國國際學校,該校係區內一間歷史悠久的老牌國際學校,著名校友包括韓國男子組合 GOT7成員王嘉爾、時裝設計師何國鉦、名人趙式芝、陳曉東、張名雅、姚嘉妮等等。


問到Uny囡囡第一日返學有無咩趣事發生,佢就話:「尋日第一日返學小魚好期待,一早就叫大家出門口,結果早咗45分鐘到學校,看得出小魚好急不及待想見老師及同學仔。不過暑假習慣咗輕鬆,唔洗早起身,尋晚小魚晚飯都話唔食,直接夜晩七點半就瞓着咗,仲一覺瞓到大天光,瞓足接近12個鐘,而家要努力同佢調節返好生理時鐘,做個早睡早起的好學生。」仲見到小魚不時做鬼臉同整1隻手指代表 「First date to School」,睇嚟又淡定又好期待新一年校園生活咁。


其實趙哲妤一向樂做廿四孝媽媽,自從生了囡囡「小魚」後,逐漸減少幕前演出,皆因想襯小朋友仲細,好好享受更多親子時光。不時抽時間帶囡囡小魚去室內互動遊樂場玩同放電。早前趁放假就為囡囡日日安排唔同節目,帶佢見佢鍾意嘅卡通人物,又同唔同嘅同齡朋友仔互動,加深友誼。更加第一次帶囡囡入戲院睇卡通片首映。暑假玩樂過後第一日番學,小魚要比心機讀書啦。



3 次查看0 則留言