• KS Media HK

打拳宣洩情緒 麥貝夷(Karene)狂做運動操Fit自己


歌手麥貝夷(Karene)早前受情傷而情緒低落,經好朋友及粉絲開解及鼓勵多外出接觸新事物下,她的情況有所改善。日前更跟著名形象指導許嘉浩(Karl Hui)出席亞視體育拳擊節目《KF1百萬拳王》現場睇拳賽。


Karene表示一直有做運動嘅習慣,平時每星期都有定期去跑步、做Gym同做瑜珈。近呢兩個月更對打拳開始感興趣:「都市人難免會有壓力,我通常都揀啲一個人可以做到嘅運動減壓,好似跑步、做Gym同做瑜珈。


最近有機會接觸到打拳,一試之下覺得打拳出拳好耗energy,又可宣洩平時壓抑嘅情緒,出一身汗感覺好好。」問到係唔係當打沙包好似打之前遇過嘅壞男人咁? 佢話唔係,之前做嘅運動屬於輕盈啲,宜家試啲重型啲嘅運動,反而做完之後身心都放鬆咗好多,好似以力量宣洩哂屈住喺裏面嘅怨氣出嚟咁。


雖然有打到手瘀腳瘀,仲比朋友笑佢係唔係比人家暴。但Karene話要開始比番啲新嘗試新挑戰自己,唔好成日驚自己做唔到而淨係收埋自己喺屋企,唔去嘗試。問到如果有人出一百萬比佢叫佢上擂台打得唔得? Karene話學識咗唔好咩都”Say No to yourself”,不過佢係初哥,要繼續學下培養興趣先知適唔適合。


而Karl表示經常獲邀出席觀看拳賽,現場近距離睇真係剌激好多。其中有幾場女子打拳賽都打到拳拳有肉,唔好睇少女仔嘅力量。加上佢哋忍痛能力好強,生仔十級痛都忍到,確實捱得。Karl更透露獲邀為拳館比賽男女拳手設計比賽服,大多以金色銀色色系為主,更會因應佢哋運動量大而揀啲散熱又可以防護嘅物料。所以自己都有去拳館試堂,感受一下運動員嘅感受同需要。


除了睇拳賽外,Karl更支持認識多年今年的新人唱作歌手洛妍(Janees),並大讚在維也納修讀音樂系嘅佢唱得唔錯。洛妍(Janees)表示剛於2019年回流香港,一直加強訓練唱歌及樂器練習。於維也納有傑出音樂成績又擅長小提琴演奏嘅佢話希望將西方體驗嘅文化融滙於東方音樂當中,更認為音樂本身無分界限,係好好嘅世界語言。以樂壇新人姿態的她仲透露早前剛拍攝宣傳照,正在籌備其個人單曲。



14 次瀏覽0 則留言