《陰陽道具》MV 內容就唔劇透啦，自己去睇呢個「18禁」加「電視禁播版」既MV啦！賣個關子就係，今次獻出左我收埋咗7年嘅螢幕初吻，我收埋咁耐係因為我覺得冇人想睇囉哈哈！同埋我同另外兩位主角強尼同埋蝦頭，係從來冇試過拍呢D認真既情慾場面，不過拍攝嘅時候出奇地順暢加自然，冇任何覺得尷尬嘅感覺，果然演員們係專業嘅！今次係未寫首歌之前，已經有MV concept嘅構思。而家做咗獨立歌手，由寫劇本，去到book場地妝頭演員，以至後期剪接製作都係由自己一手包辦，雖然心很累，但係超滿足！
《陰陽道具》係我精神病系列既第二部, 係講我地都想「性上癮」； 繼第一部 《雙面哈菲》探討「精神分裂」。
呢首歌主題既表面上係講「性解放」，
但實質係想講我哋今時今日身處喺社會同埋大世界，已經有好多嘢唔講得、有好多嘢唔做得、有好多野唔表達得，因為驚會俾人鬧同埋惹爭議.....
就好似黎到2020年，我哋公開咁談論「性」，都依然會好容易被蒙上很多污穢和被羞辱的標籤。「性」仲係好「禁忌」。
《陰陽道具》呢首歌，係藉住毫無保留咁寫「性」同沈醉於「性」「上癮」既快樂黎做一個比喻，等大家有一個寄託和發洩嘅機會，回味一下可以暢快咁表達既自由，係幾咁痛快同享受！
喺呢度祝願同埋寄望我哋終有一日能夠有返暢所欲言既人生！