• KS Media HK

雷晴雯台灣充電多驚喜 北影進修謝君豪俾壓力

更新日期:8月 17

藝人雷晴雯(Winnie)報讀了北京電影學院的演員深造課程,早前趁未開學先台灣探親兼渡假,沒想到驚喜不斷。Winnie開心表示最驚喜莫過於找回她在台灣讀書時失散接近三十年的體育老師﹕「其實我們班跟幾位老師一直有保持聯繫, 但體育老師因為彼此搬家最後失聯, 這次得數學老師提點終於成功連絡上,開心程度實在難以形容﹗」Winnie 笑言自己「好無用」,拿著電話又喊又笑跟小朋友一樣, 惹到老師都喊埋一份﹕「讀書時老師真係好錫我,過咗咁多年老師都仲記得我,仲話遲啲去北京探我,真係好感動﹗」

這次台灣之旅Winnie除咗同老師們相聚之外,仲俾佢遇上台灣著名女作家張曼娟同鄧惠文嘅演講會,Winnie雀躍不而﹕「我好細個已經喜歡張老師,而鄧醫師係我近年非常欣賞嘅心理及精神科醫師,想見其中一位已經好難,發夢都無諗過可以一次見晒兩位, 簡直喜出望外﹗」Winnie 笑言鄧惠文醫師見到她時亦開心意外﹕「 今次一返到台灣已經收到鄧醫師簽俾我嘅書同送俾我嘅Postcard,就差在之前未有機會見到面,所以今次大家都好開心,仲講好咗將來鄧醫師嚟香港時由我做東道主帶佢食香港地道美食。」

貪玩的Winnie晚上更在其好友位於饒河夜市的鞋店客串saleslady,常把香港客人嚇一大跳﹕「本來只係大家一齊傾吓偈聚聚舊, 咁啱最近佢哋人手唔夠,加上我見好多香港人講國語講到條脷打晒結,忍唔住咪幫下手囉﹗香港人聽到突然聽到間舖突然有個人同佢哋講廣東話都真係嚇一跳, 但之後就會好開心,仲話好有親切感。」Winnie表示最意外係因為咁俾佢撞返三十多年無見的兒時好友﹕「佢見我好熟口面,仲特登問咗佢老公三次我係咪講『純正』廣東話,真係好好笑﹗」Winnie更笑言連老闆好友都揶揄她說﹕「怎麼可能這樣都撞到朋友﹗ 這也太扯太誇張了吧﹗」

聊到其進修大計,Winnie表示課程約八個月將於十月底出發﹕「演員生涯本來就好漫長,內地同香港嘅演藝文化亦不一樣,趁宜家體力仲撐得住希望可以幫自己好好增值嘛。」問 Winnie會不會給自己壓力,她卻笑說壓力是來自她的偶像男神謝君豪﹕「之前睇《奪命證人》時話俾君豪知我會去北京電影學院深造,佢第一句就話北影讀書非常辛苦,同APA一樣經常排戲排到半夜,仲叫我一定要俾心機好好讀書﹗」Winnie坦言同樣說話其他講她聽完就算, 但出自謝君豪口中就變咗另一件事﹕「唔知係咪因為細細個就好鍾意君豪嘅關係, 佢講嘅說話真係唔敢唔聽,為怕返嚟無面見佢,點辛苦都會盡力做到最好﹗」

#雷晴雯 #Winnie

10 次瀏覽

© 2013 KS Production HK

KSmediaHK由KS Production於2017創立,是香港本地娛樂的網絡新媒體頻道Online Media,提供最新最快第一手的娛樂資訊,藝人及名人專訪,明星活動採訪等,請各位觀眾多多支持!