歌手可嵐自掏荷包，與庭恩兒童中心合辦一個電影欣賞會，帶同超過80名有語言障礙的小朋友及其家人，欣賞電影《明日戰記》，出錢出力支持古天樂！而藝人岑潔儀更帶同老公一起出席，以支持可嵐的善舉。
被問到為何突然有包場的想法，可嵐表示其實是想向古會長報恩之餘，更可以令更多小朋友可欣賞這部由中國人創作出來的科幻電影：「疫情期間， 會長透過演藝人協會向藝人發放資助， 我都係其中一個受惠人士。到今日我有少少能力， 我希望可以用行動支持番佢！而且我知道有好多小朋友未必有機會睇到呢部電影， 所以就連同一間慈善機構合辦咗今次嘅電影欣賞會。 我覺得每個小朋友都有佢自己嘅天賦，就算雖然佢有表達嘅障礙，但都有可能有另一方面嘅天份，所以更加要比新一代睇吓。等佢哋發掘到自己嘅專長之後，承傳我哋香港電影嘅文化，因為將來都係靠佢哋！」
而岑潔儀今次拍著拖現身，與老公一起出席活動：「收到邀請時，我覺得好有意義，亦好欣賞可嵐呢一顆善心。佢仲特登整咗張好似首映禮嘅戲飛畀啲小朋友，我覺得佢真係好有心！咁啱之前同老公都冇時間去睇，而今次又夾到時間， 所以我哋就一齊嚟睇。我聽講套戲已經去到香港華語電影紀錄第二位， 希望佢真係可以上到第一位啦！」
