• KS Media HK

陳志忠生日召集義工做慈善

更新日期:8月 17

由星元素演藝學院舉辦的《齊心抗疫大行動》已於1/3/2020星期日在學院門外舉行並完滿成功。是次活動是由學院創辦人兼武術家陳志忠師傅擔任召集人,一共30名由包括藝人朋友包括邱芷微,龐景峰,郭思琳,羅天池,黃榕及學校師生們一同擔任義工派發口罩、消毒搓手液及漂白水贈該區的長者及低收入家庭,反應熱烈。

是次活動總共派發了2515 個口罩(約503人);450 支消毒搓手液;48支清潔綠水;7桶漂白水;50卷廁紙。完全地超出原定的300個名額。感謝個機構新家園協會,以及各捐贈者/機構慷慨捐贈,包括:保潔麗、朗心國際、Royal Catering 、錢家班、陳德森導演、星元素師生、功夫山莊師生、 90後投資達人-朱公子、Mandy 、潘太、Edward Lai 、Leo 、Tse Siu Ting 、Sheung Tsui 。

功夫藝人陳志忠Wilson 表示做善事最有意義:「現在周圍都搶口罩搶廁紙等物資,有時真係有錢都未必買得到,所以統籌呢個活動都寧願叫人捐物資, 一齊做善事幫助社會上有需要嘅人,行善積福。」 被問到如何在逆境期間經營學校,Wilson 表示無奈:「都冇辦法,因為由開幕開始已經經歷社會運動及疫症,現在小朋友全部停課中,好多家長都唔俾小朋友出街及上課,對於我們做興趣教育中心都幾大挑戰。

現在都轉了做網上教學,不過始終隔住個個視像,小朋友都要得到家長的監督下才能自律地跟着我練習。我唔知道政府之前公布嘅紓困措施上用乜嘢標準來衡量中小企的支援問題,不過竟然沒有任何支援在教育方面令我都比較驚訝。個人認為教育都比較重要,所以都希望政府能夠幫下我哋經營興趣教育呢方面嘅公司。」

Wilson更表示幸好遇上良心業主一直以來的幫忙及減租,所以作為新租客的佢亦都感到幸運。 至於一直出心出力做善事的女友邱芷微更是首次自己統籌整個活動:「今次由搵NGO 合作,搵人捐抗疫物品,搵義工,預備活動用品等工作都只係用咗一星期時間籌備。好開心得到各位學院師生及各方藝人好友幫手。近日公司在營運上都面對好大挑戰,所以預期冇乜野做,不如做多d善事幫助多啲社會有需要嘅人。」

談到首次統籌過程中遇到的趣事,Chelffy 笑言未試過貼街招:「由設計海報到周圍貼海報宣傳都係自己搞掂,好采中途遇到好多街坊行過嚟叫我加油打氣,感覺很有愛及溫暖。不過最令我開心嘅就係自己的粉絲們知道我要籌集物資及搵義工幫手嘅時候都義不容辭捐出口罩及抽出時間做義工,令我更覺得生命影響生命的意義。透過今次的活動我都希望可以組織自己的粉絲義工團,一齊幫助社會更多有需要的人,這是我一直以來的夢想。」


2 次瀏覽

© 2013 KS Production HK

KSmediaHK由KS Production於2017創立,是香港本地娛樂的網絡新媒體頻道Online Media,提供最新最快第一手的娛樂資訊,藝人及名人專訪,明星活動採訪等,請各位觀眾多多支持!